အပူပိုင်းဒေသ ရဲ့ စိမ်းမြလွှာပါး နှလုံးသား..ရယ်လို့ တင်စားထားရတဲ့ ပုပ္မါးတောင်ရိပ် တစ်စွန်းတစ်စ ကို ခိုလှုံမိ ချိန်မှာတော့ အာရုဏ်တက် လုနီးနေပါပြီ...။ ကျောက်ပန်းတောင်း မြို့ထဲမှာ ဆွမ်းချက်ပြီး လောင်းလှူရန်ပြင်ဆင်နေကြတဲ့ သူများ နဲ့ စတင်သက်ဝင်လှုပ်ရှား နေခဲ့တာမို့ ကျွန်မတို့ ရွှေနဒီ-ပရဟိတ ဘုန်းတော်ကြီးသင်ပညာရေးကျောင်း ကို ရောက် ရှိချိန် ရဲ့ ခံစားချက်ဟာ စိမ်းစိမ်းစိုစို ရှိနေခဲ့ပါတယ်..။
ဖြူဖွေးနေတဲ့ စာသင်ကျောင်း ရဲ့ အစွန်း ထက် မှောင်မဲနေတဲ့ နောက်ခံ ဖြစ်လို့နေတဲ့ ကောင်းဒီတောင်ထက်မှ ထိန်ထိန်ဝေနေအောင်မီးပူဇော်ထားတဲ့ ဗုဒ္စရုပ်ပွားတော်မြတ်ကို ရှင်းရှင်းလင်းလင်း၊ထင်းကနဲ ဖူးတွေ့ လိုက်ရတာမို့ အေးကနဲ စိမ့်ကနဲ ဖြစ်ကာငြိမ်းချမ်းအေးမြသွားခဲ့တာ လန်းဆတ်ကြည်လင်သွားစေခဲ့တာ ကိုတော့ ကျွန်မ မှတ်မှတ်ရရ စွဲထင်ခဲ့ပါတယ်။
တောတောင်ကြောင့်အေးတာလား၊ ရာသီဥတုကြောင့်လား၊ ဖြန့်ကျက် လွှမ်းခြုံ ထားတဲ့ မေတ္တာ တရားကြောင့်ပဲလား။ သုံးခု စလုံးပဲ ကြောင့်ပဲ ဖြစ်ပါလိမ့်မယ်....သစ်လွင်တဲ့ မနက်ခင်းတစ်ခုကို ဖမ်းဆုပ် ထိတွေ့ ရတာ..အမှန်ပါ။
ဒီလို ကုသိုလ်အဝန်းအဝိုင်းတစ်ခု ဖြစ်မြောက် အောင် ငွေသိန်း ၅၇ကုဋေ နှင့်ကျောင်းဆောင်များစွာ စတင်လှူဒါန်းခဲ့သူတွေကတော့ ရွှေနဒီမိသားစု ဖြစ်တဲ့ သီဟသုဓမ္မမဏိဇောတဓရ ဥိးစိုးသိမ်း နှင့် သီရိသုဓမ္မသိဂီင်္ ဒေါ်ဆင်နု တို့ ပဲဖြစ်ပါတယ်..။ သူတို့ရဲ့ ရဲရင့်တဲ့ သဒ္စါ တရား က တော့ ဘဝများစွာကို ရွှေချပေးမဲ့ တကယ့်ရွှေရောင်မြစ်တစ်စင်း ပေါ့လေ..။သာဓု များစွာ ခေါ်ဆိုမိပါတယ်။
မိဘ မဲ့ တဲ့ ကလေးတွေ...မိဘ အစုံအလင် မရှိတဲ့သူတွေ..၊ ကျောင်းနေရန်အခက်အခဲမရှိတဲ့သူတွေ..။
ဆင်းရဲသူဆင်းရဲသားတွေ..၊ ဝေးလံခေါင်းပါးတဲ့ ဒေသက တိုင်းရင်းသား၊တိုင်းရင်းသူလေးတွေ အတွက် အတွက် ပညာရေစင် ဝလင်စေဲ့တဲ့ နေရာလေးတစ်ခု ဖြစ်ခဲ့တာ သာဓုခေါ်ရပါတယ်..။ အခုအချိန် မှာ (ကိုရင် ၁၀၄ ပါးနှင့်သီလရှင် ၁၆ပါး) အပါအဝင်ကျောင်းသား၃၃၆ ယောက် ဟာ ညိမ်းချမ်း အေးမြစွာ ပညာသင်ယူနေကြ ပါတယ်..။ ကျောင်းအိပ်ကျောင်းစားဖြစ်လို့ သွားလာရေးလည်းမခက်ခဲ... စားရေး သောက်ရေးလည်းပူပင်စရာမလို တဲ့ ပညာရေးအိုအေစစ်...အစစ်ပါပဲ..။ ၂၀၀၈ သြဂုတ်လ က၁၅ ရက် မှ စတင် ဆောက်လုပ်ခဲ့ပြီး ၊ မေလ၂၇ ရက် ၂၀၁၀ မှာပြီးစီးခဲ့ပါတယ်..။
*စိမ်းလန်းဝေစည်
ရွှေနဒီ
ပညာရည်နို့
ချိုမြိန်လို့
သားသားမီးမီးသောက်ကြစို့ ..ဆိုတဲ့ အားကိုး မှီတည်ရာ စည်ပင်စိမ်းလန်းနေပါပြီ..။**
ဒီနေရာကို ကျွန်မ ရောက် လာခဲ့တာကလည်း ပုပ္မါးချစ်သူများအဖွဲ့ ရဲ့ ဖိတ်ကြားချက် ကြောင့် ဟောပြောပွဲ ပြုလုပ်မဲ့နေရာကို ရောက်လာခဲ့တာပါ..။
စတင် ဝင်လာ ကတည်းက စနစ် တကျ စိုက်ပျိုးထားတဲ့ တမာပင်တန်းတွေ..ရေတမာပင်တန်းတွေ ၊ ကျွန်းအုပ်ပင်တန်း .. ခပ်လတ်လတ် ကလေးတွေ..ဇီးဖြူပင်ကလေးတွေ နဲ့ စိမ်းမြနေတာ မို့ ဒီကျောင်းမှာ အစိမ်းရောင် ဆရာတော် တစ်ပါးပါးတော့ ရှိနေလိမ့်မယ် ဆိုတာကျွန်မ ခန့်မှန်းမိပါတယ်..။
ပုပ္မါးတောင်ဝန်းကျင် စိမ်းလန်းစိုပြေရေး ၊ သဘာဝ ပတ်ဝန်းကျင် ထိန်းသိမ်းရေး ထိန်းသိမ်းရေး အတွက် ပုပ္မါးချစ်သူများအဖွဲ့ ကို ဦးဆောင်လှုပ်ရှားပေးနေတဲ့ ရွှေ နဒီ ပရဟိတ ဘကကျောင်းရဲ့ လက်ထောက်ကျောင်းအုပ်ဆရာတော် ဘဒ္ဒန္တ ယုဇန ကျွန်မ ဖေါ်ပြခဲ့တဲ့ စိမ်းစိုတဲ့ နံနက်ခင်း များစွာကို နေ့စဉ် ဖွင့်လှစ်နေခဲ့တာပါ။
ဆရာတော် ဘုရား ရဲ့ မိဘ မဲ့ကလေးများ အပေါ် ဖခင် သဖွယ် ထိန်းသိမ်းစောင့်ရှောက်နေသလို....သဘာဝပတ်ဝန်းကျင်ကိုလည်း မိဘ သဖွယ် စောင့်ရှောက် ထိန်းသိမ်းနေပါတယ်..။ ပြုစု ပျိုးထောင်နေဆဲလည်းဖြစ်ပါတယ်..။ ဘုန်းဘုန်း အာလေး (ရာဟုလာ သင်တန်းကျောင်းက -ဒေါက်တာ အရှင် အာစာရ) ပြောပြတင်စားထားသလို လူပင်တွေလည်းစိုက်၊ သစ်ပင်တွေလည်း စိုက်တဲ့ ရဟန်းတစ်ပါးပါ။
ဘုန်းဘုန်းယုဇနစိုက်ပျိုးခဲ့တာ ကျွန်မ မေးမြန်း လျှောက်ထားကြည့်တော့ ကျွန်းပင်၂၀၀၀၊ စန္ဒကူးအပင် ၃၀၀-စိုက် တာ ၄၅ ပင် ရှင်ပါသတဲ့ ၊ နံ့သာနီ ၁၅၀၀စိုက်တာ -အပင်၂၀၀ ပဲသေတယ်ဆိုတဲ့မှတ်တမ်းလေးတွေတွေ့ရပါတယ်။၊ တမာပင် အပင် ၆၀ ၊နဂါးမောက် တစ်တိုင် ၃ပင် နဲ့ ကွန်ကရစ်တိုင် ၆၀-မို့ နဂါးမောက်အပင် ၁၈၀ကလည်း သီးနေပါပြီ၊ ဝါး ရုံ ပင်က၂၀ ၊ မန်ကျည်း ၅၀၊ရေတမာ အပင် ၁၀၀ တို့ကြောင့်လည်း ကျောင်းနေရာ ၁၄ ဧက ဟာ စိမ်းလန်းနေခဲ့တာပါ..။
ဘုန်းဘုန်းက ကျောင်းထဲအပြင် နောက်ဘက်ကကောင်းဒီတောင် နဲ့ ပုပ္မါးတောင် ဒေသ ကို ထိန်းသိမ်းဘို့ အတွက် ဇီးဖြူပင်တွေ၊ ဖန်ခါးပင်တွေ၊ မြန်မာ တည်သီးပင် တွေ စိုက်ဘို့ အစီအစဉ် နဲ့ ပျိုးပင်တွေ ပျိုးထားပြီးဖြစ်ပါတယ်..။
ကျွန်မ စိတ်အဝင်စားဆုံးကတော့ ဘုန်းဘုန်းတို့ ကျောင်းနောက်ဘက် ကမြင်နေရတဲ့ ကောင်းဒီတောင် ပေါ်က ဂျီ ဖမ်းတဲ့ထောင်ခြောက် တွေအကြောင်းပါ..။
သဘာဝပတ်ဝန်းကျင် ဆိုတာ ဇီဝမျိုးကွဲ တွေ ပြည့်စုံကြွယ်ဝနေရပါမယ်..။ ညီညွတ်မျှတနေရပါမယ်..။ တောတောင် တွေဟာ သားကောင်မုဆိုးတွေ ၊ သစ်ခွ မုဆိုးတွေ၊ သစ်ခုတ် မုဆိုးတွေ ၊ သယံဇာတ မုဆိုးတွေ ရဲ့ ပြစ်ခတ် သတ်ဖြတ်မှုတွေ၊ ခုတ်ထစ် တူးဖြို မှုတွေ ကြောင့် အကျည်းတန်နေခဲ့တာကြာပါပကောလား။
မိုးလေးတဖွဲဖွဲ ရွာနေတဲ့ ညတစ်ည မှာတော့ ကောင်းဒီတောင်ပေါ် ကနေ ဂျီအော် သံ သဲ့သဲ့ ကြားရပါတယ်..။ ဒီအသံ သည် ဘယ် လိုဝေဒနာကိုအခြေ ခံကာ ပေးလာတာလည်းဆိုတာကို ဘုန်းဘုန်းယုဇန ကဘုရားသားတော်ပီပီ ရိပ်မိခဲ့ပါတယ်..။ နားနဲ့ တင်မက နှလုံးသားဖြင့်ခံစားနားလည်ခဲ့တာမို့ ဆက်လက် မကျိန်းစက်နိုင်တော့ပါ..။
သူတော်ကောင်းတုိ့ရဲ့ ကရုဏာ နှလုံးသားသည် ဒုက္ခ ဖြင့် အချက်ပြ လာလျှင် လျစ်လျူရှု ရိုးထုံးစံ မရှိ ခဲ့တာ မို့ ဘုန်းဘုန်းယုဇန မိုးထဲထွက်ကာတောင်ပေါ်တက်ရပါတယ်..။ ကျောင်းနေကိုရင် ငယ်လေးများကိုအဖေါ်ပြုကာ ဂျီသံကြားရာတောင်ပေါ်ကို တက်ရပါတယ်..။
ဂျီထောင်တယ် ဆို တဲ့ မုဆိုးတွေက လူသွားလမ်းမှာထောင်လေ့မရှိတာမို့ ဆူးကြားခြုံကြားထဲ တိုးဝင်ရပါတယ်..။ လက်မောင်း လက်ဖျံတို့ မှာ ဆူးရှ ပွတ်တိုက်သွားတာ..ခြေချော်မကျအောင်ထိန်းရတာ..။ အဲဒီအခက်အခဲတွေကို မွန်မြတ်တဲ့ ကရုဏာ နှလုံးသားကသာ ကျော်လွှားနိုင်တာမို့ ဂျီထောင်ခြောက်ရှိရာ ရောက်ခဲ့ ပါတယ်..။
သန်းစဖွယ် ဂျီငယ်လေး ဟာ ကလေးငယ် တစ်ဥိးလို ထိန့်လန့်တုန်လှုပ်နေပါတယ်..။ စက်ဘီးဘရိတ်ကို ကြိုးကွင်း ပြု ပြီး ထောင်ခြောက်လုပ်ထားတာမို့ လွတ်လိုလွတ်ငြား ရုန်းကန် ထားခဲ့တာက လည်းကျော ပြင် မှာ ပွန်းရှသွေးစို့နေခဲ့ပါတယ်..။
ဘုန်းဘုန်းယုဇန တို့ကယ်ဆယ်ရေး အဖွဲ့က ထောင်ခြာက်ကြိုးတွေကို ခက်ခက် ခဲခဲ ဖြုတ် ပေးပြီး ဂျီငယ်လေးကို သင်္ကန်း စဖြင့် ထွေးပွေ့ သယ်ယူခဲ့ပါတယ်..။
ဘုန်းဘုန်း ရဲ့ ကရုဏာ အဟုန်က သာလွန်ခဲ့တာမို့ ဒီဂျီငယ်လေးလို များရှိနေလေမလားဆိုတဲ့ စိတ်က ဆက်လက် ရှာဖွေ ခဲ့တာ..အဲဒီတစ်ည ထဲမှာပဲ ထောင်ခြောက် ပေါင်း၆၄ ခုတိတိ ဖြုတ် ပစ်နိုင်ခဲ့ပါတယ်..။
ကျောင်းပြန်ရောက်တော့လည်းမနားနိုင်။ သင်္ကန်း နဲ့ ထွေးပွေ့ထားတဲ့ ဂျီငယ်လေး ရဲ့ ဒဏ်ရာကို ဆေးကြောသုတ်သင်ကာ ဗိစပ်ရွက်များ နဲ့ ဆေးထည့်ရပါတယ်..။ နောက်တစ်နေ့မှာတော့ တိရိစ္တာန် ဆေးကု ဆရာဝန်ခေါ်ကာ ဆေးကုသရပါတော့တယ်..။
သေဘေးမှ လွတ်လာတဲ့ ဂျီငယ်လေး ရဲ့ကြောက်လန့်တဲ့မျက်လုံးလေး တွေကနေရဲရင့်သည်အထိ အကြင်နာ နဲ့ ထွေးပွေး ထားနိုင်ခဲ့တာ ဟာ လူ့ဘဝ ရဲ့ အပီပြင်ဆုံး အဓိပ္မါယ် တစ်ခုပါ။
မေတ္တာ၊ကရုဏာ ဆိုတဲ့ အဆင့်မြင့် စိတ်ကျင့်စဉ် အမျိုးအစားကို ပေးလှူပါရန် အဘယ်မည်သော ဘာသာစကား ဖြင့်တောင်းဆိုရန် လိုအပ်ပါမည်လဲ..။
စစ်မှန်သောမေတ္တာ တရားသည် အသားအရောင် ဖြူခြင်း၊ မဲခြင်း၊ ပုခြင်း၊ ရှည်ခြင်း၊ ပိန်ခြင်း၊ဝခြင်း၊ ဆင်းရဲခြင်း၊ ချမ်းသာခြင်း စတဲ့လောက ပညတ်များကို ကျော်လွှား ဖြတ်သန်း စီးဆင်း စေတဲ့ အရှိန်အဟုန် ကိုပိုင်ဆိုင် တာ ကျွန်မ အသေအချာ ယုံကြည်မိပါတယ်..။
ကျွန်မတို့ သဘာဝပတ်ဝန်းကျင် ထိန်းသိမ်းရေး လုပ်ဆောင်သူတွေဟာ.. ခေတ်မီနည်းပညာ တွေ သိထားရုံ နဲ့ မလုံ လောက်ဘူးဆိုတဲ့ သင်္ခန်းစာ တစ်ခုကို ခံစား နားလည်ရပါတယ်။
ဘုန်းဘုန်းယုဇန တို့ ကဲ့သို့ ရဲရင့် တဲ့ ကရုဏာ နှလုံးသားမျိုးရှိဘို့လိုအပ်တယ် ဆိုတာ ကိုလည်း ကျွန်မ သင်ယူရပါတယ်..။
ကျွန်မ သိထားတတ်ထားတဲ့ မြန်မာ ဘာသာ..အင်္ဂလိပ်ဘာသာ၊ အီတလီဘာသာ...ထို့ထက် နက်နဲသိမ်မွေ့ တဲ့ မေတ္တာစကားကို ကရုဏာ နှလုံးသားနဲ့ နားလည် ဘို့ နှလုံးသားချင်းထပ်တူပြု နိုင်ဘို့ ... ခံစားဖြေရှင်းပေးနိုင်ဘို့၊ အပင်ပန်းခံ...ပြီးရဲရင့်စွာ ကယ်တင်နိုင်ဘို့...ကျွန်မတို့များစွာလေ့ကျင့်သင်ယူရပါအုံးမည်..။
ရွှေနဒီ ပရဟိတ ဘုန်းတော်ကြီးသင်ပညာရေးကျောင်းမှ၊ ဘုန်းဘုန်းယုဇန ကဲ့သို့ စိမ်းလန်းအေးမြသော ကရုဏာ နှလုံးသားများစွာ ပေါ်ထွက်လာပါစေကြောင်းဆုတောင်းရပါတယ်။ ထိုထို သောသူတော်ကောင်းတို့ ရဲ့ ကရုဏာ နှလုံးသားဖြင့် နာမကျန်းဖြစ်ကာပူပြင်းလောင်ကျွမ်း လုနီနီး ဖြစ်နေသော ကျွန်မ တို့ရဲ့ ကမ္ဘာ့ပတ်ဝန်းကျင်ကို ကယ်တင်သူများ စွာပေါ်ထွက်နိုင်ကြပါစေကြောင်း ဆုတောင်း မေတ္တာ ပို့သအပ်ပါတယ်..။
ကျွန်မတို့ချစ်သော ကမ္ဘာမြေသည် ဗြဟ္မစိုရ် နှလုံးသားတို့ ဖြင့် စိမ်းလန်းခြင်းတည်ပါစေသတည်း။
မေတ္တာဖြင့်
သစ္စာအလင်း
၎၊၉၊၂၀၁၃ (ခေတ္တ-ပုပ္မါး)
ဤစာစုဖြင့် ကျောက်ပန်းတောင်းမြို့၊ အောင်မင်္ဂလာ ရပ်ကွက်၊ ရွှေနဒီ ပရဟိတ ဘုန်းတော်ကြီးသင်ပညာရေးကျောင်းမှ၊ ဘုန်းဘုန်းယုဇန အား ဦးတင် ဂုဏ်ပြု လိုက်ပါတယ်..။