ချစ်ခင်လေးစားရပါသော ဓမ္မမိတ်ဆွေများရှင့်...
ဘဒ္ဒ ကမ္ဘာမှာ ပွင့်တော် မူပြီး ကြလေကုန်သော ဘုရားရှင်တို့၏ ဓာတ်တော် မွေတော် များကိန်းဝပ်ရာ လေးဆူဓာတ်ပုံ၊ ရွှေတိဂုံစေတီရဲ့ ထီးတော်ရိပ်မှ နှုတ်ခွန်း ဆက်သ လိုက်ပါတယ်။ ဓမ္မ မိတ်ဆွေ များအားလုံး ကျန်းမာ ချမ်းသာ ကြပါစေလို့ ဆုတောင်းမေတ္တာ ပို့သနေမိပါတယ်။
ကျွန်မဟာ စနေ၊ တနင်္ဂနွေရက်များတွင် ဓမ္မဗျူဟာနှင့် မင်္ဂလာဗျူဟာ ဓမ္မစာပေသင်တန်း ကျောင်းများမှာ သင်တန်းတက် ရောက်လို့ နေခဲ့ပါတယ်။ ဓမ္မဘလော့ဂါ တဖြစ်လဲ ဘဝနဲ့ မြန်မာနိုင်ငံကို ပြန်ရောက် ခဲ့ကတည်းက အမြင်တွေဟာ အရင်ကနဲ့ မတူပြောင်း လဲခဲ့ပါပြီ။ ပုရွက်ဆိတ် သကာအိုးထဲ ကျသလို မြင်မြင်သမျှ၊ ကြားကြားသမျှ၊ ပို့စ်ရေးတင်ချင်နေမိ ပြောပြချင်နေမိပြီး၊ အာရုံထွေပြားနေကာ တိတိပပ ရေးသားမရပဲ ဖြစ်နေခဲ့ရပါတယ်။
ပိုင်းလော့ဆရာတော် ဘုရားကြီးကျောင်းမှ အမဒေါ်ဝင်းနဲ့ ကမ္ဘာအေး ဈေးထဲမှ သစ်သီး ဆိုင်ပိုင်ရှင် အမ ဒေါ်လှခင်တို့ ရဲ့ ဗုဒ္ဓတရားတော် အပေါ် လေးလေးနက်နက် ရိုသေမှု၊ လမ်းပြ ကူညီမှုများကြောင့် ကျွန်မ ရဲ့ အာရုံများဟာ ဝိသုဒ္ဓမဂ် ဆိုတဲ့ အာရုံ တစ်ခုတည်းမှာ စုစည်းမိပြီး စာမေးပွဲ ဖြေဆိုဘို့ထိ ပြင်ဆင်ဖြစ်ပါတော့တယ်။ ဝိသုဒ္ဓိမဂ် အကြောင်းကို အဘိဓမ္မာ အခြေခံ ရှိပြီး သူတိုင်း လေ့လာ ဖြေဆိုလို့ရပါတယ်။ သာသနာရေးဝန်ကြီးဋ္ဌာနက ကျင်းပပြုလုပ်တဲ့ အဘိဓမ္မာ စာမေးပွဲ၊ အဘိဓမ္မာ ဂုဏ်ထူးဆောင်(ဋီကာကျော်) စာမေးပွဲများကို ဖြေဆို အောင်မြင်ထားပြီးဖြစ်ပေမဲ့ မေ့မေ့နေတဲ့ မှတ်ဉာဏ်ကို ပုတ်ရိုက်နှိုးဆော်ရင်း ကျွန်မ ကြိုးစား ရပါတော့တယ်။
ကျွန်မရဲ့ ဓမ္မမိတ်ဆွေများကို သင်တန်း အတွေ့ အကြုံများနှင့်အတူ ကျွန်မသိသမျှ ဓမ္မများကို မျှဝေ ရေးသားဘို့ ဘုန်းဘုန်း ဦးလောကနာထ (http://www.lknt.org) ကလည်း တိုက်တွန်း လမ်းညွှန်ထားလို့ ကျွန်မ မှတ်တမ်းများစတင် ရေးသားရပါတယ်။ မင်္ဂလာဗျူဟာ နှင့် ဓမ္မဗျူဟာသင်တန်းကျောင်း နှစ်ခု ကူးပြီး စေတနာ အပြည့်အဝနဲ့ သင်ကြား ပို့ချ ပေးတဲ့ သင်တန်းဆရာတော်ကတော့ ဆရာတော် အရှင်ပဏ္ဍိတ (ကထိက-အဘိဓမ္မပိဋက မဟာဋ္ဌာန)၊ နိုင်ငံတော် ပရိယတ္တိ သာသနာ့တက္ကသိုလ် (ရန်ကုန်) ဖြစ်ပါတယ်။
ဝိသုဒ္ဓိမဂ် အဋ္ဌကထာ ကျမ်းဆိုတာကတော့ သံယုတ္တ နိကာယ်၊ သဂါထာဝဂ္ဂ၊ ဒေဝတာသံယုတ်၊ ဇဋာသုတ်လာ (သီလေပတိဋ္ဌာယ နရော သပညော) စသောဂါထာကို ရှေးဦးစွာ ထုတ်ပြပြီးလျှင် အဲဒီ ဂါထာ၌ အဦးပဓာနပြု၍ ဟောတော်မူအပ်သော သီလ၊ သမာဓိ၊ ပညာ တရားသုံးမျိုးကို အသီးသီး အကျယ် ဝေဖန်လျက် နိဒ္ဒေသ ၂၃-ခု (အခန်း- ၂၃ ခန်း) ခွဲခြား၍ ရေးသားတော် မူခဲ့သော ဂန္ထဝင် မြောက် ကျမ်းမြတ် တစ်ဆူ ဖြစ်ပါတယ်။
ဇဋာ ဆိုတာကတော့ ကွန်ရက် အရှုပ်အထွေး များစွာရှိတဲ့ တဏှာရဲ့ အမည်ဖြစ်ပါတယ်။ တဏှာ ဆိုတာကတော့ အာရုံ-၆ပါး တို့၌ အထက်အောက် ခေါက်တုန့်ခေါက်ပြန် အဖန်ဖန် ဖြစ်ပေါ်ခြင်းကြောင့် ချုပ်စပ်ခြင်း သဘော အားဖြင့်ဝါးရုံစသည်တို့ ရဲ့ အခက် အလက် လို့ ဆိုအပ်တဲ့ ကွန်ရက်အရှုပ် အထွေးနဲ့ တူပါတယ်။ ဒါကြောင့်မို့လို့ တဏှာကို အရှုပ်အထွေး (ဇဋာ) လို့ဆိုခြင်း ဖြစ်ပါတယ်။ ဇဋာသုတ် ကမြတ်စွာ ဘုရားရှင်က နတ်သား တစ်ပါး ကို ဟောတဲ့ လေးပါဒ ၃၂ လုံး ရှိတဲ့ဂါထာလေးကို အကြောင်းပြု ပြီး သည် အဋ္ဌ ထာ ကြီးကို ရေးသားခဲ့တာဖြစ် ပါတယ်။
ရေးသားရာမှာလည်း-
နိကာယ်ငါးရပ်တို့မှ လာသော သီလ၊ သမာဓိ၊ ပညာနှင့်သက်ဆိုင်သည့် သုတ်ပုဒ်၊ ပါဠိတော်တို့ကို ယုတ္တိ သာဓက အဖြစ် ထုတ်ဆောင်ပြီး ပြဆိုခြင်း။
ထိုသုတ်ပုဒ် ပါဠိတော်တို့၏ အနက်အဓိပ္ပါယ်တို့ကို သီဟိုဠ် အဋ္ဌကထာတို့မှ ဘာသာပြန်၏ အစွမ်း ဖြင့်ဖော်ပြခြင်း။
သီဟိုဠ် အဋ္ဌကထာ တို့မှာ ပြဆိုထားသော သီဟိုဠ်ဝတ္ထု သာဓကများ ၊ အဆုံးအဖြတ်များကိုလည်း ထည့်သွင်းဖော်ပြခြင်း။
အထူးသဖြင့် အဲဒီခေတ် အဲဒီ အခါက မဟာဝိဟာရဝါသီ တို့၏ အယူဝါဒနှင့်ဆန့်ကျင်ဘက်ဖြစ်သည့် ထင်ရှား သောဝါဒကွဲများကို ထည့်သွင်းရေးသား ဖော်ပြပြီးတော့ အဲဒီ ဝါဒကွဲတွေကို အကြောင်းယုတ္တိ အမျိုးမျိုး ပြပြီး ပယ်ဖျက်ခြင်း ဟူသော ကျမ်းရဲ့ အခြေခံရမဲ့ မူတွေကို စီရင်ချမှတ်ပြီးမှ ရေးသားပြုစု ထားခြင်း ဖြစ်ပါတယ်။
ဝိသုဒ္ဓိ မဂ္ဂ = ဝိသုဒ္ဓိ + မဂ္ဂ (မဂ်)
ဝိသုဒ္ဓိ = အညစ်အကြေး အလုံးစုံကင်းစင်သော နိဗ္ဗာန်၊ ထက်ဝန်းကျင်စင်ကြယ်သောနိဗ္ဗာန်
မဂ္ဂ (မဂ်) = ရောက်ကြောင်းဖြစ်သော အကျင့်လမ်း
ဝိသုဒ္ဓိ မဂ္ဂ= နိဗ္ဗာန် ရောက်ကြောင်းအကျင့်၊ နိဗ္ဗာန်ရောက်ကြောင်း လမ်းစဉ်
အညစ် အကြေး အလုံးစုံကင်းသော၊ ထက်ဝန်းကျင်စင်ကြယ်သော နိဗ္ဗာန် (ဝိသုဒ္ဓိ) သို့ ရောက်ကြောင်း ဖြစ်သောအကျင့်၊ လမ်းစဉ် (မဂ္ဂ)ကို ဝိသုဒ္ဓိမဂ္ဂ= ဝိသုဒ္ဓိ မဂ် ဟုခေါ်ဆိုခြင်း ဖြစ်ပါတယ်။
စီစဉ်ရေးသားတော်မူခဲ့တဲ့ သူကတော့ အိန္ဒိယနိုင်ငံသား (အရှင်မဟာ ဗုဒ္ဓဃောသ မထေရ်) ဖြစ်ပါတယ်။ သီဟိုဠ်ကျွန်း၊ အနုရာဓမြို့၊ မဟာဝိဟာရ ကျောင်းတိုက်ကြီး၏ တောင်ဘက် ပဓာနဃရ ပရဝုဏ်တွင် မဟာ နိဂမသာမိ မည်သော ဒါယကာရဲ့ ပြာသာဒ် ၌ သီတင်းသုံးနေစဉ်မှာ အရှင်သံဃပါလမထေရ်ရဲ့ တိုက်တွန်းချက်ကြောင့် သာသနာ နှစ် - ၉၇၃ မှာ ရေးသားခဲ့ခြင်း ဖြစ်ပါတယ်။
ရေးသားရာမှာလည်း သီလ၊ သမာဓိ၊ ပညာ လို့ဆိုအပ်တဲ့ ဝိသုဒ္ဒိမဂ္ဂ (နိဗ္ဗာန်ရောက်ကြောင်း အကျင့်လမ်းစဉ်) ကို မှန်မှန်ကန်ကန် ဖော်ပြထားပါတယ်။ နိဗ္ဗာန်ကို အလိုရှိတဲ့ သူတော်ကောင်းတွေ မှန်မှန်ကန်ကန် သိစေချင်တဲ့ အကျိုးကို ရည်ရွယ်ပြီး သည်အဋ္ဌကထာကို စီရင် ရေးသားခဲ့တာဖြစ်ပါတယ်။
အမှီ ပြုရေးသားတဲ့ ရှေးအဋ္ဌကထာဟောင်းတွေကတော့ မဟာဝိဟာရဝါသီ မထေရ်မြတ်တို့ ဟောပြော သင်ကြားနည်းလို့ ဆိုအပ်တဲ့ နိကာယ် ငါးရပ်တို့ရဲ့ မဟာအဋ္ဌကထာ၊ ကုရုန္ဒီအဋ္ဌကထာ၊ မဟာပစ္စရီ အဋ္ဌကထာ တို့ကို အမှီပြု ရေးသား ထားတာဖြစ်ပါတယ်။
အဲဒီ အချိန်ဟာ တတိယ သံဂါယနာတင်ပြီးတဲ့ အချိန်ဖြစ်ပါတယ်လို့ သင်တန်းဆရာတော် အရှင်ပဏ္ဍိတ က ရှင်းလင်းပြတော် မူပါတယ်။ ဆရာတော်က ကျွန်မတို့ကို သင်ကြားပြတာကတော့ ကိုယ်တိုင် ရေးသားတော်မူတဲ့ မှတ်စု ကတော့ မဟာစည် ဆရာတော် ဘုရားကြီး ရေးသားတော်မူတဲ့ ဝိသုဒ္ဓိမဂ် မြန်မာပြန် စာအုပ် ကို ကိုးကား ပြီး ပို့ချချက်များ စီစဉ်ရေးသားပေး ထားခဲ့ပါတယ်။
ဝိသုဒ္ဓိမဂ် ကျမ်း ထင်ရှားကျော်ကြားရတဲ့ အကြောင်းရင်းကတော့-
၁။ စင်ကြယ်သော ပါဠိပိဋကတ်မှီရာရှိခြင်း။
၂။ သိက္ခာ သုံးပါးကို အကျဉ်းချုံးသိမ်းသွင်းထားခြင်း။
၃။ရှေး အဋ္ဌကထာဟောင်းတို့ရဲ့ ဘာသာပြန်ကျမ်းဖြစ်ခြင်း။
၎။ တစ်ပါးသောဂိုဏ်းသားတို့ရဲ့ အယူဝါဒ များကို ကြဉ်ထားခြင်း။
၅။ မိမိဂိုဏ်း အယူရဲ့ စင်ကြယ် မှုကိုဖော်ပြခြင်း။
၆။ သီလ၊ဓုတင်၊ သမထ၊ အဘိဉာဉ်၊ ပညာ အပြားစသည်တို့ကို အပြည့်အစုံဝေဖန်ပြထားခြင်း။
၇။ အရဟတ္တဖိုလ်တိုင်အောင်၊ အကျင့်ပဋိပတ်နည်းကို အပြည့်အစုံပြထားခြင်း။
၈။ ပေါ်လွင်ထင်ရှား၍ ရှုပ်ထွေး ခြင်းကင်းသော ပုဒ်၊ဝါကျတို့ကို ပြုစီရင်ထားခြင်း။
၉။ သိလွယ်သောအနက်ရှိခြင်း။
၁၀။ ကြည်ညိုဖွယ်ကောင်းပြီး တွေ့မြင်ကြားသိရာကို အတုလိုက်၍ ကျင့်ခြင်းသို့ရောက်စေ နိုင်သော ဝတ္ထုကြောင်းတို့ကို ထည့်သွင်း ဖော်ပြထားခြင်းတို့ကြောင့် ဝိသုဒ္ဓိ မဂ်ကျမ်းကြီး ထင်ရှားကျော်ကြား ရခြင်းဖြစ်ပါတယ်။
ခြုံငုံပြောရရင်တော့ ဝိသုဒ္ဓိမဂ် အဋ္ဌကထာသည် ဘာဝနာ လုပ်ငန်းကို စနစ်တကျလမ်းညွှန်ပေးတဲ့ ကျမ်းမြတ် တစ်ဆူဖြစ်ပါတယ်။ ပိဋကတ် သုံးပုံမှ အရသာ၊ အဆီ အနှစ် များကို ထုတ်ယူထားတဲ့ ပိဋကသြဇာ လည်းဖြစ်ပါတယ်။ ဝိသုဒ္ဓိမဂ် အဋ္ဌကထာ ကျမ်းကြီးက ဝိသုဒ္ဓိမဂ် အဋ္ဌကထာ ကိုလုံးစေ့ ပါဌ်စေ့ အပြည့်အစုံ မြန်မာ ဘာသာကို ပြန်ဆိုထား တဲ့ မြန်မာ အဋ္ဌကထာ ကျမ်းကြီးရယ်လို့လည်း တန်ဘိုးထား ပူဇော် သင့်လှပါတယ်။
ကျွန်မတို့ရဲ့ ကိုယ်ကျင့်တရား တွေပိုမို ကောင်းမွန်လာအောင်၊ ဘာဝနာ လုပ်ငန်းတွေ အားထုတ်ချင်စိတ် ဖြစ်ပေါ်လာ အောင်၊ သံသရာ ဝဋ်ဆင်းရဲမှ လွတ်မြောက်အောင်၊ နိဗ္ဗာန်ရောက်ကြောင်း အကျင့်လမ်းစဉ်များကို စနစ်တကျ ညွှန်ပြပြီး စည်းရုံးဆွဲဆောင် ခေါ်ငင်နိုင်စွမ်းလည်းရှိတဲ့ ဝိသုဒ္ဓိမဂ် အကြောင်းကို အကျင့်ဆိုင်ရာ ဘာသာရေးသုတ များတိုးပွားစေလို တဲ့စေတနာ ဖြင့် ကျွန်မရဲ့ *သစ္စာအလင်း* စာမျက်နှာများမှာ ရေးသားပူဇော် သွားပါမယ်။
သင်္ခန်းစာ များအတိုင်းမဟုတ်ပဲ သီလအကြောင်း၊ ဓုတင်၊ အဘိဉာဉ်၊ အနုဿတိ များအကြောင်း သိမှတ်ဖွယ် ရာများကို ထုတ်နုတ်ရေးသား သွားပါမယ် ဆိုတာ ပြောကြားရင်း မိတ်ဆက်လိုက်ပါတယ် ဓမ္မ မိတ်ဆွေများရှင့်။
ကျမ်းကိုး၊
ဝိသုဒ္ဓိမဂ်မြန်မာပြန်ပို့ချချက် - ပထမဆင့် (အရှင်ပဏ္ဍိတ-ကထိက-နိုင်ငံတော် ပရိယတ္တိသာသနာ့တက္ကသိုလ်-ရန်ကုန်၊ ၂၀၀၈)
0 မှတ်ချက်ရေးရန်:
Post a Comment