တိမ်တခဲနက် ကြည့်ရင်းပျက်သို့၊

 

သက်ရှိများကို ခင်မင် တွယ်တာ လို့ အားမရ၊ သဘာဝပတ်ဝန်းကျင် ကိုပါ မြတ်နိုးတွယ်တာ တတ်ခဲ့သော ကျွန်မ အတွက် ဝေဒနာ နှင့် တဏှာ ကြား အစပ်( ပဋိစ္စ သမုပ္ပါဒ် စက် ဝိုင်းမှ အကွက် ၂ နှင့် ၃) သည် ပြတ်ခွင့် မကြုံ အဝိုင်းပြေးခဲ့ရ ဘဝတွေ လည်း ရှည် လျား၊ ကာလ တွေလည်းများခဲ့ပါ ပြီ..။ ကျွန်မ ဘဝ တွင် လေးနှစ်တာ သံယောဇဉ် ဖြစ်တည် ခဲ့တဲ့ အီတလီ အလယ် ပိုင်း ဟာ အခုတော့ Red Zone တဲ့လားကွယ်..။

မှန်ပြူတင်းပေါက် မြင့်မြင့် တပ်ဆင်ထားတဲ့ အဆောင် အိပ်ခန်း မှ တဆင့် လှပ တဲ့ သဘာဝ ပတ်ဝန်းကျင် ဟာ ကျွန်မ နဲ့ တစ်သား တည်းနေထိုင် ခဲ့တာ ဘယ်မေ့လို့ ရမှာလဲ..။ အခုတော့ အုတ်ကျိုးပုံများကြား မှာ အရုပ်ဆိုးအကျည်းတန်ခဲ့ရပါပြီ…။

လွမ်းမောခံစားခဲ့သော နှင်းတွေဝေသော၊ လမင်းသာသော ညများကို အိပ်ပစ်ရမှာ နှမျော ပါတယ် ဆိုတဲ့ တက္ကသိုလ်ဘုန်းနိုင် ဝတ္ထု ထဲက ခိုင် လို လို၊ အစော လို လို ခံစား ခဲ့ဘူး တဲ့ အရှေ့တိုင်းသူ တစ်ယောက် ဟာ သူချစ် တဲ့ ဒေသ အတွက် ဆုတောင်းပေးဘို့ မေတ္တာဓာတ်တွေ လွှမ်းခြုံစေစားဘို့ ပျက်ကွက် ခဲ့တာ….။ ကိုယ် ကိုယ် တိုင် ပင် ခွင့်လွှတ်နိုင်စရာမရှိ..။

အဲဒီအချိန် များ မှာ ကျွန်မ ဟာ ILO, Assignment တစ်ခု နဲ့ အင်တာနက် ဝင်ရန်ပင် ပျက်ကွက်ခဲ့ သောနေ့ရက်များ ….၂၀၁၆ အောက်တိုဘာ…..
ထို ရက်တွေမှာ ကျွန်မ ချစ်တဲ့ University of Camerino ဟာ အနှစ် ၃၀ အတွင်းအကြီးမားဆုံးသော ငလျင် ရဲ့ ဆုပ်ကိုင် လှုပ်ခတ်မှုကြောင့် မွမွကြေခဲ့ရတာ….. အလွန်ပဲကြေကွဲစရာ…..။

ဒီနေ့ တော့ အဲဒီမှာ နေတဲ့ သူငယ်ချင်း ကနှင်းတွေ လွှမ်းတဲ့ ပုံလေးတင်တယ်… သို့သော် ကိုယ် သိဘူးတဲ့နေရာမဟုတ်လို့ မေးမိတော့မှ တက္ကသိုလ် ဟာ ငလျင် စိုးရိမ် အဆင့် ရောက်နေလို့ သူရွှေ့ပြောင်းနေထိုင် ရတဲ့နေရာဖြစ်ကြောင့်ထိတ်လန့်တကြား…….ကြားသိရ…

ကျွန်မ ကျောင်း တက်စဉ် ကာတွေ မှာ နှင်းတွေ ဖုံးလွှမ်းနေတဲ့လှပလွန်းသော အယ် ပီးနီး Apennine
တောင်တန်း တွေ အောက် မှာ ငလျင်ကြော ဟာ ကံကြမ္မာ ဆိုးတွေ နဲ့ အတူ အိပ်မောကျနေခဲ့တယ် ဆိုတာ ကျွန်မ အဲဒီတုံး ကမတွေးခဲ့မိတာ အမှန်ပါ..။

ခြိမ်းခြောက်မှု များစွာ နဲ့ ရှင်သန် နေထိုင်ရ ပါသော…လုံခြုံ မှုကင်းမဲ့ နေပါ သော လူ့ဘဝ ရရှိခြင်း သည်ပင် ဒုက္ခသစ္စာ.. ပါပဲရယ် လို့ ကျွန်မ ထပ် မံသင်ယူရပြန်ပါတယ် ချစ်သော တက္ကသိုလ်…။

ပုဂ္ဂိုလ် သတ္တ၀ါ ဟူ၍ အမှန် မရှိ အတ္တ ဇီဝ ဟူ ၍ မရှိ ပါသော ခန္ဓာ ငါး ပါး ရုပ် နာမ် တရား ဟာ ခဏ တိုင်း ခဏ တိုင်း ဖြစ် ပျက်နေကြပါ တယ် ။ မမြဲခြင်း သည် သာ မြဲခြင်း သဘောကိုဆောင်ပြီး မြဲတယ် ခိုင်တယ် ယူဆ တဲ့အရာတွေ ဟာ
မမြဲ ခြင်း သဘော ကို ဆောင်နေကြ တယ် ဆိုတာ မသိချင်ယောင်ဆောင်လို့ မရတော့ပါဘူးလေ..။

မမြဲ ခြင်းဟူ သည် အနိစ္စ ပင် ဖြစ်ပါ တယ် ။ ဖြစ်ပျက် မူ ကို အမြဲ တစေ ခံနေ ရခြင်း ဟာ ဒုက္ခ ပါ။ သူ့ သဘော အတိုင်း ဖြစ် ပျက် နေခြင်း တာမို့ ကိုယ် အစိုးမရ ခြင်း သဘော အနတ္တ တရား ကို ရင်မှာ ပိုက်ပြီး ကျွန်မ ဆုတောင်းမေတ္တာ ပို့သချင်ပါတယ်..။

“အသက်စည်းစိမ် ခန္ဓာအိမ်ကား၊
တိမ်တခဲနက် ကြည့်ရင်းပျက်သို့၊
မျက်စိအောက်တွင် ပျောက်လွင့်စင်၏၊
သင်္ခါရစက် သူ့ပိုင်နက်၌၊
သွက်သွက်လည်ကာ ပါရရှာသည်၊
ခန္ဓာအနိစ္စပါတကား ဖြစ်တာပျက်ဖို့ပါတကား”

ရယ်လို့ သဘာဝ တရား က သင်ပြတဲ့ သင်္ခန်းစာတွေ နဲ့ အတူ တင်းနေအောင်ချည် နှောင်တဲ့ သံယောဇဉ် ကြိုးဖြင့် ကျွန်မ ချစ်တဲ့ တက္ကသိုလ် လို ကျွန်မ တို့ သည် လည်း ဘယ်နေရာ ဘယ် အခါ မှာ ပြိုလဲ မှု များ ကြုံ ရမှာ ပါလိမ့်…။

အမှန်တရား ကို လက်သင်ခံ ရင်ဆိုင် ရဲဝံ့…ရင်း ………. သံဝေဂ ရယူမိ တယ် ချစ်သော တက္ကသိုလ် ..။

ကျွန်မသည်လည်း ခုနေသေရင် အကုန်တန်းလန်းထားခဲ့ ရမယ် ဆိုတာ တိုးတိုးဖွဖွ.....နှလုံးသွင်းဆင်ခြင်ရင်း အေးမြသော မေတ္တာတရားကို စေလွှတ်အပ်ပါတယ်..။

မေတ္တာဖြင့်
သစ္စာအလင်း