- အမေမွေးတဲ့ ခန္ဓာ၊ ဖြစ်တည်လာမှု
ရွှေရတုနဲ့ လေးခု နှစ်များ၊
ကာလရှည်လျား၊ ကုန်ဆုံးသွားခဲ့။
ဘဝပုံရိပ် ၊ ထိုအတိတ်ဟာ…
အရိပ်ပမာ၊ အတိတ်ခန္ဓာ အဖြစ်…..
ဆုပ်ညှစ်ဆွဲကိုင် မပိုင်ဆိုင်ပါ။
- အနာဂတ်ခန္ဓာ ၊ ရောက်မလာသေး
ရန်ဘေးကင်းစွာ၊ အနာမဲ့ရေး၊
ကျန်းမာရေး အတွက်……..
အေးချမ်းစေ..ကြောင်း၊ဆုမွန်တောင်းလို့
အကြောင်းဖြည့်ဆည်း၊ အကျိုးပြီးအောင် ဆောင်ရွက်ပါလည်း
အနာဂတ်အရိပ်၊ ထို နိမိတ် ဟာ…
အိပ်မက်တစ်ခုသာ ဖြစ်ပါတယ်။
- ပစ္စုပ္ပန်ခန္ဓာ ၊ သေချာစောင့်ကြည့်…
မောဟ နဲ့ ပညာ ၊
ပညာ နဲ့ မောဟ..
အလှည့်ကျ ဝေခွဲ..၊
သည်တိုက်ပွဲ ဟာ ခက်ခဲ ပင်ပန်းလွန်းပါတယ်..။
- ပညာ ရဲ့ အသိ
သတိရှိစေ၊ ပိုင်းခြားလေမှ
ဒွါရအာရုံ ဆုံကြလေတိုင်း
အချိန်တိုင်းမှာ၊ ငါးခန္ဓာမွေး
မွေးရင်းနဲ့သေ၊ သေရင်းနဲ့မွေး
ခုမွေးခုသေ၊ ဖြစ်ပျက်နေကြ အနိစ္စသာ
မြင်ရတာမို့၊ ခန္ဓာချုပ်စဲ ၊ မမြဲပါ။
- သုံးပါးသမယ၊ သုံးကာလမှာ
ဘဝရှည်ကြာ…..ခန္ဓာ မတည်၊
အလီလီဖြစ် ၊ဖြစ်ရင်းပျက် ရ
ကာလလွတ်ပိုင်း
အချိန်တိုင်းမှာ……မွေးသေတာမို့
အချိန်တိုင်းမွေးနေ့ …..ရှိနေတယ်။
အချိန်တိုင်းသေနေ့ ……ရှု နေတယ်။
(ကျေးဇူးတော်ရှင် ပိုင်းလော့ဆရာတော်ဘုရားကြီးဟောကြားတော်မူသော ခန္ဓာငါးပါး ဖြစ်ပျက်မှုသည် ကာလ သုံးပါးမှ လွတ်သည် ) ဟူသောတရားကို နာယူခံစား၊ ကိုးကား ရေးဖွဲ့ပါတယ်။
၆.၃. ၂၀၁၁ တွင် ကျရောက်ပါသော ဘုန်းဘုန်းဦးလောကနာထ ၏ မွေးနေ့ အတွက် - ဓမ္မလက်ဆောင်မွန် အဖြစ် လှူဒါန်းပူဇော်လျက် ဒီကဗျာကိုရေး ပါတယ်။
မေတ္တာဖြင့်
သစ္စာအလင်း
0 မှတ်ချက်ရေးရန်:
Post a Comment